ഗ്രാമ / വാർഡ് സഭ വിവരങ്ങള്‍

ഗ്രാമസഭ / വാർഡ് സഭ

ജനപങ്കാളിത്തം • ജനാധിപത്യം • വികസനം

പുത്തൻവേലിക്കര ഗ്രാമപഞ്ചായത്ത്

ഗ്രാമസഭയുടെ പ്രാധാന്യം

പ്രാദേശിക വികസന പ്രവർത്തനങ്ങളിൽ ജനങ്ങളുടെ നേരിട്ടുള്ള പങ്കാളിത്തം ഉറപ്പാക്കുന്ന ജനാധിപത്യ സംവിധാനമാണ് ഗ്രാമസഭ. ഗ്രാമത്തിന്റെ വികസന ആവശ്യങ്ങൾ ചർച്ച ചെയ്യുന്നതിനും പദ്ധതികൾക്ക് മുൻഗണന നിശ്ചയിക്കുന്നതിനും ഭരണനിർവഹണത്തിൽ സുതാര്യതയും ഉത്തരവാദിത്വവും ഉറപ്പാക്കുന്നതിനും ഗ്രാമസഭ പ്രധാന പങ്ക് വഹിക്കുന്നു.

ഗ്രാമസഭയെക്കുറിച്ചുള്ള അടിസ്ഥാന വിവരങ്ങൾ

1 ഗ്രാമസഭ / വാർഡ് സഭ

ഒരു ഗ്രാമപഞ്ചായത്തിന്റെ ഭൂപ്രദേശത്തിൽ ഉൾപ്പെട്ട ഒരു ഗ്രാമത്തെ സംബന്ധിച്ച വോട്ടർപട്ടികയിൽ പേര് ചേർത്തിട്ടുള്ള എല്ലാ ആളുകളും ചേർന്നതാണ് ആ ഗ്രാമത്തിന്റെ ഗ്രാമസഭ.

2 ഗ്രാമസഭ / വാർഡ് സഭ അംഗം

ഒരു ഗ്രാമത്തിലെ ഒരു വാർഡിലെ വോട്ടർ ആ വാർഡിലെ ഗ്രാമസഭയിലെ അംഗമാണ്. അതുപോലെ മുനിസിപ്പാലിറ്റിയിലെ ഒരു വാർഡിലെ വോട്ടർ ആ വാർഡ് സഭയിലെ അംഗമാണ്.

3 കൺവീനർ

വാർഡ് മെമ്പർമാരാണ് ഗ്രാമസഭകളുടെ കൺവീനർമാർ. ഒരു കൺവീനർക്ക് ചുമതലകൾ നിർവഹിക്കാൻ കഴിയാത്ത സാഹചര്യമുണ്ടായാൽ തൊട്ടടുത്ത വാർഡിലെ അംഗത്തെ കൺവീനറായി നിയമിക്കാവുന്നതാണ്.

4 അധ്യക്ഷൻ

ഗ്രാമസഭാ യോഗത്തിൽ ഗ്രാമപഞ്ചായത്ത് പ്രസിഡന്റാണ് അധ്യക്ഷനാകേണ്ടത്. പ്രസിഡന്റിന്റെ അസാന്നിധ്യത്തിൽ വൈസ് പ്രസിഡന്റോ ഇരുവരുടെയും അസാന്നിധ്യത്തിൽ കൺവീനറോ അധ്യക്ഷനാകും.

5 യോഗം വിളിക്കൽ

ഗ്രാമസഭാ യോഗങ്ങൾ വിളിച്ചുചേർക്കേണ്ട ഉത്തരവാദിത്വം കൺവീനർ കൂടിയായ വാർഡ് അംഗത്തിൽ നിക്ഷിപ്തമാണ്.

6 ക്വാറം

ഗ്രാമസഭയുടെ ക്വാറം ആകെ വോട്ടർമാരുടെ 10 ശതമാനമാണ്. ക്വാറം തികയാത്തതിനാൽ മാറ്റിവെച്ച യോഗം വീണ്ടും ചേരുമ്പോൾ ക്വാറം 50 ആയിരിക്കുന്നതാണ്.

7 പ്രത്യേക യോഗം

ഒരു വാർഡിലെ വോട്ടർമാരിൽ 10 ശതമാനത്തിൽ കുറയാത്തവർ രേഖാമൂലം ആവശ്യപ്പെട്ടാൽ 15 ദിവസത്തിനകം കൺവീനർ പ്രത്യേക യോഗം വിളിച്ചുചേർക്കേണ്ടതാണ്.

8 കോ-ഓർഡിനേറ്റർ

ഗ്രാമപഞ്ചായത്ത് തീരുമാനിക്കുന്ന ഒരു ഉദ്യോഗസ്ഥൻ ഗ്രാമസഭയുടെ കോ-ഓർഡിനേറ്ററായി പ്രവർത്തിക്കും. ഗ്രാമസഭയുമായി ബന്ധപ്പെട്ട പ്രവർത്തനങ്ങളിൽ കൺവീനറെ സഹായിക്കേണ്ടത് കോ-ഓർഡിനേറ്ററുടെ ചുമതലയാണ്.

9 ചോദ്യങ്ങളും നിർദ്ദേശങ്ങളും

ഗ്രാമസഭയിൽ പരിഗണിക്കേണ്ട ചോദ്യങ്ങളും നിർദ്ദേശങ്ങളും യോഗത്തിന് മുമ്പോ യോഗം നടക്കുമ്പോഴോ എഴുതി സമർപ്പിക്കാൻ അംഗങ്ങൾക്ക് അവകാശമുണ്ട്.

10 പ്രമേയങ്ങൾ

ഗ്രാമസഭയുടെ അധികാരപരിധിയിൽപ്പെട്ട വിഷയങ്ങളെക്കുറിച്ച് യോഗത്തിൽ ഭൂരിപക്ഷ അടിസ്ഥാനത്തിൽ പ്രമേയങ്ങൾ പാസാക്കാവുന്നതാണ്.

ഗ്രാമസഭയുടെ അധികാരങ്ങളും ചുമതലകളും

A. പദ്ധതി ആസൂത്രണവും നിർവഹണവും

  1. വികസന പദ്ധതികൾ ആവിഷ്കരിക്കുന്നതിന് ആവശ്യമായ വിശദാംശങ്ങൾ ശേഖരിക്കാൻ സഹായിക്കുക.
  2. ഗ്രാമപഞ്ചായത്ത് പ്രദേശത്ത് നടപ്പാക്കേണ്ട പദ്ധതികളുടെയും വികസന പരിപാടികളുടെയും നിർദ്ദേശങ്ങൾ തയ്യാറാക്കുകയും മുൻഗണന നിശ്ചയിക്കുകയും ചെയ്യുക.
  3. കരട് പ്രോജക്ട് നിർദ്ദേശങ്ങൾ ഗ്രാമസഭയിൽ അച്ചടിച്ച് വിതരണം ചെയ്യുകയും അവ പരിശോധിച്ച് മുൻഗണനാക്രമം നിശ്ചയിക്കുകയും ചെയ്യുക.
  4. വികസന പദ്ധതികൾ ഫലപ്രദമായി നടപ്പാക്കുന്നതിന് സഹായം നൽകുക, സൗകര്യങ്ങൾ ലഭ്യമാക്കുക, സന്നദ്ധസേവനം നൽകുക, പണമോ സാധനങ്ങളോ സമാഹരിക്കുക.

B. പൊതുസൗകര്യ പദ്ധതികളുമായി ബന്ധപ്പെട്ടവ

  1. തെരുവുവിളക്കുകൾ, പൊതുജലവിതരണ ടാപ്പുകൾ, പൊതുകിണറുകൾ, പൊതുശുചിത്വ സംവിധാനങ്ങൾ, ജലസേചന സൗകര്യങ്ങൾ തുടങ്ങിയവ എവിടെ സ്ഥാപിക്കണമെന്ന് നിർദ്ദേശിക്കുക.
  2. മറ്റ് പൊതുസൗകര്യ പദ്ധതികളുടെ ആവശ്യകതയും സ്ഥലവും സംബന്ധിച്ച് നിർദ്ദേശങ്ങൾ സമർപ്പിക്കുക.

C. മരാമത്ത് പണികളുമായി ബന്ധപ്പെട്ടവ

  1. ഗ്രാമസഭാ പ്രദേശത്ത് നടപ്പാക്കിയതോ നടപ്പാക്കാൻ ഉദ്ദേശിക്കുന്നതോ ആയ പ്രവൃത്തികളുടെ എസ്റ്റിമേറ്റ്, സാമഗ്രികളുടെ ചെലവ് തുടങ്ങിയ വിശദാംശങ്ങൾ അറിയുക. ഈ വിവരങ്ങൾ ഗ്രാമസഭയിൽ വിതരണം ചെയ്യേണ്ടതാണ്.
  2. വികസന പരിപാടികൾ ഏറ്റെടുത്തു നടത്തുന്ന ഗുണഭോക്തൃ കമ്മിറ്റികളെ നിരീക്ഷിക്കുകയും സഹായിക്കുകയും ചെയ്യുക.
  3. പ്രദേശത്ത് നടപ്പാക്കാൻ ഉദ്ദേശിക്കുന്ന പ്രവൃത്തികളെ സംബന്ധിച്ച വിശദമായ എസ്റ്റിമേറ്റുകളുടെ വിവരങ്ങൾ ശേഖരിക്കുക.

ജനപങ്കാളിത്തമാണ് ഗ്രാമവികസനത്തിന്റെ അടിസ്ഥാനം.

ഗ്രാമസഭാ യോഗങ്ങളിൽ സജീവമായി പങ്കെടുക്കുക. നിങ്ങളുടെ വാർഡിന്റെ വികസന ആവശ്യങ്ങൾ, നിർദ്ദേശങ്ങൾ, പരാതികൾ എന്നിവ യോഗത്തിൽ അവതരിപ്പിക്കുക. നാടിന്റെ വികസനത്തിൽ പങ്കാളികളാകുക.